ଢେଙ୍କାନାଳ ୯/୬ : ରାଇସ୍ ମିଲ୍ କାନ୍ଥ ଭୁଶୁଡି ୪ ଜଣ ପ୍ରାଣ ହରାଇଥିବା ବେଳେ ୧୨ରୁ ଅଧିକ ଆହାତ ହୋଇଛନ୍ତି । ଆହାତ ମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଛି । ଅଳସଆ ହାଟ ନିକଟରେ ଏପରି ଅଘଟଣ ଦେଖିବାକୁ ମିଳିଛି । ସାପ୍ତାହିକ ହାଟ ଚାଲିଥିବାରୁ କାନ୍ଥ ତଳେ ବସିଥିଲେ ଦୋକାନୀ । କାନ୍ଥ ତଳେ ଗାଡି ଚାପିହେବା ସହ କିଛି ଲୋକ ବି ଫଶି ରହିଥିବା ଆଶାଙ୍କା କରାଯାଉଛି । ଓଡ୍ରାଫ ଟିମ୍ ଓ ଅଗ୍ନିଶମ ପକ୍ଷରୁ ଉଦ୍ଧାର କାର୍ୟ୍ୟ ଜାରୀ ରହିଛି । ଉଦ୍ଧାର କାର୍ୟ୍ୟରେ ସ୍ଥାନୀୟ ଲୋକେ ବି ସାମିଲ ଅଛନ୍ତି ।
ମିଳିଥିବା ସୂଚନା ଅନୁଯାୟୀ ଢେଙ୍କାନାଳ ଟାଉନ ଥାନା ଅନ୍ତର୍ଗତ ଷ୍ଟେସନ୍ ବଜାର ଅଳସୁଆ ହାଟରେ ପ୍ରତ୍ୟେକ ରବିବାର ହାଟ ବସିଥାଏ । ଆଜି ସକାଳୁ ମଧ୍ୟ ବେପାରୀମାନେ ଆସି ହାଟ ଆରମ୍ଭ ହୋଇଥିଲା । ଏହି ସମୟରେ ହାଟରେ ଥିବା ଡି. ହଂସରାଜ ରାଇସ୍ ମିଲର ଏକ ପରିତ୍ୟକ୍ତ କାନ୍ଥ ହଠାତ ଭୁଶୁଡି ପଡ଼ିଥିଲା । ରାଇସ୍ ମିଲର କାନ୍ଥଟି ଦୁର୍ବଳ ଥିଲା ବୋଲି କୁହାଯାଉଛି। ଫଳରେ ସେଠାରେ ପରିବା ବିକୁଥିବା ବ୍ୟବସାୟୀମାନେ ଚାପି ହୋଇଯାଇଥିଲେ ବୋଲି ଜଣାଯାଇଛି। ଓଡ୍ରାଫ୍ ଟିମ୍ ୪ ଜଣଙ୍କୁ ମୃତ ଅବସ୍ଥାରେ ଉଦ୍ଧାର କରିଥିବା ବେଳେ ୧୨ରୁ ଅଧିକଙ୍କୁ ଗୁରୁତର ଅବସ୍ଥାରେ କାନ୍ଥ ତଳୁ ବାହାର କରିଛନ୍ତି । କାନ୍ଥ ତଳେ ଆହୁରି କିଛି ଲୋକ ରହିଥିବା ଅନୁମାନ କରାଯାଉଛି ।
