ଭୁବନେଶ୍ୱର: ମହାମାରୀର ବିଭୀଷିକା ପାଇଁ ଅନ୍ୟକୁ ଦୋଷ ଦିଅ ନାହିଁ । ଏହି କଥା କହିଛନ୍ତି ଇଟଲୀୟ ଔପନ୍ୟାସିକା ଫ୍ରାନ୍ସସେସ୍କା ମିଲାନ୍ଦ୍ରୀ ।
କରୋନା ମହାମାରୀର ଭୟାବହ ପରିପ୍ରେକ୍ଷୀରେ ଭାରତ ପାଇଁ ଏକ ବାର୍ତ୍ତା ଦେଇ ମିଲାନ୍ଦ୍ରୀ କହିଛନ୍ତି, ” ତୁମର ଭୟ ଓ ଆଶଙ୍କା ପାଇଁ ଅନ୍ୟକୁ କାହାରିକୁ ବା କୌଣସି ଗୋଷ୍ଠୀକୁ ଦୋଷ ଦେବା ପାଇଁ କେହି ଯେମିତି ତୁମକୁ ପ୍ରବର୍ତ୍ତାଇବାରେ ସଫଳ ନ ହେଉ। ଯଦି କୌଣସି ସରକାର, କ୍ଷମତାସୀନ ମଣିଷ ବା ଧର୍ମସଂସ୍ଥାନ ଯଦି ପ୍ରତିପାଦନ କରିବାକୁ ଚାହୁଁଥାଏ ଯେ ଗୋଷ୍ଠୀ ବିବାଦ ହିଁ ସଂକ୍ରମଣ ରୋକିବାର ରାସ୍ତା, ତାହେଲେ ସେମାନେ ଭାଇରସ ନୁହେଁ ବରଂ ଗଣତନ୍ତ୍ର ବିରୁଦ୍ଧରେ ଲଢେଇ କରିଛନ୍ତି । ଏବଂ ସେମାନଙ୍କର ଲକ୍ଷ୍ୟ କ୍ଷମତାକୁ ଜାବୁଡି ଧରିବା, ଜନସ୍ୱାସ୍ଥ୍ୟକୁ ସୁରକ୍ଷା ଦେବା ନୁହେଁ ।”
ଇଟାଲୀର ରୋମ ସହରରେ ଦୀର୍ଘ ଏକ ମାସରୁ ଉର୍ଦ୍ଧ ସମୟ ଧରି ଲକଡାଉନରେ ପିଡୀତ ଔପନ୍ୟାସିକା ମିଲାନ୍ଦ୍ରୀ ସମ୍ପ୍ରତି ‘ଦ ଗରଦିଅନ’ ସମ୍ବାଦପତ୍ରରେ କରୋନା ମହାମାରୀରେ ଆକ୍ରାନ୍ତ ଇଉରୋପୀୟବାସୀଙ୍କ ପାଇଁ ଏକ ଚିଠି ଲେଖି ବିଶ୍ୱରେ ଚର୍ଚ୍ଚାରେ ଅଛନ୍ତି।
” ମହାମାରୀଉତ୍ତୋର କାଳରେ ସବୁ କିଛିର ପରିବର୍ତନ ହୋଇଯିବ । ତେବେ ପୃଥିବୀର ସ୍ଥିତି କଣ ହେବ ତାହା ବର୍ତମାନ କହିବା ସମ୍ଭବ ନୁହେଁ । ଯଦି ବି କେହି ଏହି ଭବିଷ୍ୟତ ସମ୍ପର୍କରେ କହୁଥାଏ ତାହାହେଲେ ସେ ବିଶ୍ୱରେ ବର୍ତମାନ କଣ ଘଟୁଛି ତାହା ଠିକଭାବେ ବୁଝି ନାହିଁ । ”
” ମୁଁ କେବଳ ଏତିକି ଦେଖି ପାରୁଛି ଯେ, ସବୁକିଛି ଭିନ୍ନ ହୋଇଯିବ । ଆମର ସମାଜ, ବିଶ୍ୱର ଭୂ-ରାଜନୈତିକ ଶକ୍ତି ଭିତରେ ଥିବା ସମ୍ପର୍କ, ପଂଜୀବାଦର ଭୂମିକା, ବିଜ୍ଞାନ ଓ ବୈଜ୍ଞାନିକ ଗବେଷଣା ସହ ରାଜନୀତିର ସମ୍ପର୍କ, ବନ୍ୟଜନ୍ତୁଙ୍କ ଠାରୁ ମଣିଷକୁ କରୋନା ଭୂତାଣୁ ସଂକ୍ରମିତ ହେବା ଖବର ପରିପ୍ରେକ୍ଷୀରେ ମଣିଷ ଏବଂ ପ୍ରାକୃତିକ ପରିବେଶ ତଥା ପୃଥିବୀର ଇକୋଲୋଜିର ସମ୍ପର୍କରେ ପରିବର୍ତ୍ତନ ଘଟିବ।”
ମହାମାରୀରୁ ମାନବ ସମାଜକୁ ରକ୍ଷା କରିବା ଦିଗରେ ସାହିତ୍ୟର ଏକ ଯାଦୁଗରୀ ଭୂମିକା ରହିଛି ବୋଲି ମିଲାନ୍ଦ୍ରୀ କହିଛନ୍ତି । “ତହାହିଁ ପ୍ରକୃତରେ ସାହିତ୍ୟର ଯାଦୁ: ଅନ୍ୟ ଏକ ମଣିଷର ଜୀବନ ଯାହା ଜଣେ ହୁଏତ ଜୀଇଁ ପାରିବନି ବା ନିଜେ ସେହିଭଳି ଏକ ଜୀବନ ଜୀଇଁବାକୁ ଚାହିଁବନି ସେହିଭଳି ମଣିଷ ସହ ନିଜକୁ ଚିହ୍ନିବାର, ସହାନଭୂତି ଦେଖାଇବାର ସମ୍ଭାବନା, ଆଉ ନିଜର ନିକଟ ପହଞ୍ଚ ବାହାରେ ଥିବା ଅନ୍ୟ ଏକ ମଣିଷର ଅନୁଭୂତିକୁ ଦେଖିବା ।”
” ଏବଂ ଯଦି କୌଣସି ସମୟ ଥାଏ ଯେତେବେଳେ ସହିତ୍ୟର ଶକ୍ତି ବିଶ୍ୱ ସମୁଦାୟର ସମବେଦନାକୁ ସାଉଁଟିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ବହନ କରେ ତାହା ବର୍ତ୍ତମାନର ଏହି ସମୟ।”
