ଓଡ଼ଗାଁ ୧୭/୧ : ଓଡ଼ଗାଁରେ ଗତକାଲି ବିଳମ୍ବିତ ରାତିରେ ଜଣେ ମାନସିକବିକୃତ ଯୁବକ ଉନ୍ମତ୍ତ କାଣ୍ଡ ସମସ୍ତଙ୍କୁ ଚକିତ କରିଛି । ଏହି ଯୁବକ ଜଣକ ଲୁହା ରଡରେ ଆକ୍ରମଣ କରିବା ସହିତ ପଥର ମାଡ଼ କରିବା ଫଳରେ ଦୁଇଜଣଙ୍କ ମୃତ୍ୟୁ ଘଟିଛି । ଏଥିରେ ୪ ରୁ ଉଦ୍ଧ୍ୱର୍ ବ୍ୟକ୍ତି ଆହତ ହୋଇଛନ୍ତି । ତାକୁ ଆୟତ୍ତ କରିବାକୁ ଯାଇ ଥାନା ଆଇଆଇସି ଆତ ହୋଇଥିଲେ ହେଁ ତାକୁ ଧରିପାରି ନଥିଲେ । ଆହତଙ୍କ ମଧ୍ୟରୁ ଦୁଇଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କ୍ୁ କଟକ ଏସସିବି ମେଡିକାଲ କଲେଜ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ଅନ୍ୟମାନେ ନୟାଗଡ଼ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଆଜି ପୂର୍ବାହ୍ନରେ ଶରଣକୁଳ ପୋଲିସ ସ୍ଥାନୀୟ ଲୋକଙ୍କ ସହାୟତାରେ ଯୁବକକୁ କୋ÷ଣସିମତେ କାବୁ କରିଛି । ତେବେ ପୋଲିସ ଘଟଣାସ୍ଥଳକୁ ବିଳମ୍ବରେ ଆସିଥିବାରୁ ଦୁଇଜଣଙ୍କ ମୃତ୍ୟୁ ଘଟିଲା ବୋଲି ଅଭିଯୋଗ କରି ସ୍ଥାନୀୟ ଲୋକେ ଆଜି ସକାଳୁ ଓଡ଼ଗାଁରେ ରାସ୍ତା ରୋକ କରିଥିଲେ । ଏହି ଘଟଣାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି ।
