ଭୁବନେଶ୍ୱର : ଦେଶରେ ଅନେକ ମହିଳା ଶାଢ଼ୀ ତଳେ ଶାୟା ପିନ୍ଧନ୍ତି l ତେବେ ଶାୟା ପିନ୍ଧିଲେ କଣ ମାରାତ୍ମକ ବ୍ୟାଧି କ୍ୟାନ୍ସର ହୋଇପାରେ?

ସାଧାରଣତଃ ମହିଳାମାନେ ଶାୟା ପିନ୍ଧିବା ବେଳେ ଶାୟାର ଫିତାକୁ ଅଂଟାରେ କଷିକରି ବାନ୍ଧନ୍ତି l ଏହା ଫଳରେ କ୍ୟାନ୍ସର ହେବାର ସମ୍ଭାବନା ରହିଛି l

ଜବାହାରଲାଲ ନେହରୁ ମେଡିକାଲ କଲେଜର ଡାକ୍ତରଙ୍କ ମତରେ ଶାୟା ପିନ୍ଧାରୁ ମାର୍ଯୋଲିନ ଅଲସର (Marjolin ulcer) ବା ସ୍କିନ କ୍ୟାନ୍ସର ହେବାର ସମ୍ଭାବନା ରହିଛି l ମଧ୍ୟ ପ୍ରଦେଶର ୱାରଧାସ୍ଥିତ ମେଡିକାଲ କଲେଜର ଡାକ୍ତରମାନଙ୍କ କହିବା କଥା ଯେ ଶାୟା ନାଡ଼ାର ଅଣ୍ଟାର ମାଂସପେଶୀ ଉପରେ ଚାପ ଏବଂ ଘର୍ଷଣ ଯୋଗୁଁ ଚର୍ମରେ ଜ୍ୱଳନ ସୃଷ୍ଟି ହୋଇଥାଏ ଏବଂ ଏହା ଫଳରେ କ୍ୟାନ୍ସର ହୋଇପାରେ l ଯାହାକୁ ସେମାନେ petticot cancer ବା ଶାୟା କ୍ୟାନ୍ସର l ଏହି ଦୁରାରୋଗର ଶିକାର ହୋଇଥିବା ଦୁଇଜଣ ମହିଳାଙ୍କୁ ଚି଼ହ୍ନଟ କରିଥିବା କଥା ସେମାନେ ବିଏମଜେ କେଶ ରିପୋର୍ଟ ନାମକ ଡାକ୍ତରୀ ପତ୍ରିକାରେ ଉଲ୍ଲେଖ କରିଛନ୍ତି l ବହୁଦିନ ଅଣ୍ଟାରେ ଦେଖା ଦେଇଥିବା ଘା’ ଭଲ ନହେବାରୁ ମହିଳାଙ୍କର  ଵୟୋପସି କରାଯାଇଥିଲା l ଷାଠିଏ ଏବଂ ସତୁରୀ ବର୍ଷର ମହିଳା ଦୁଇ ଜଣଙ୍କୁ ସେମାନଙ୍କ ଅଣ୍ଟାରେ ଦେଖା ଦେଇଥିବା ଘା’ ର ଅସ୍ତ୍ରୋପ୍ରଚାର ନିମନ୍ତେ ଅଙ୍କୋଲୋଜି ଅର୍ଥାତ କ୍ୟାନ୍ସର ବିଭାଗକୁ ପଠା ଯାଇଥିଲା

କେବଳ ୱାରଧା ନୁହଁ ଏହିଭଳି ଘଟଣା ଚେନେଇ, ବାଙ୍ଗାଲୁରୁ ଓ ମୁମ୍ବାଇ ଚି଼ହ୍ନଟ ହୋଇଛି l

ଆଗରୁ ଏହାକୁ ଶାଢ଼ୀ କ୍ୟାନ୍ସର ବୋଲି କୁହା ଯାଉଥିଲା l କିନ୍ତୁ ପ୍ରକୃତରେ ଏହା ଶାୟା ପିନ୍ଧାରୁ ହେଉଥିବା ଜଣା ପଡିଛି l

କେବଳ ଶାୟା ପିନ୍ଧିବାରୁ ନୁହେଁ ଧୋତି ପିନ୍ଧାରୁ ମଧ୍ୟ ସ୍କିନ କ୍ୟାନ୍ସର ହୋଇପାରେ l ପ୍ରାୟ ଅଶି ବର୍ଷ ତଳେ ଜଣେ ଭାରତୀୟ ପାଥୋଲୋଜିଷ୍ଟ ଏହିଭଳି ଆଠଜଣ କ୍ୟାନ୍ସର ରୋଗୀଙ୍କୁ ଚି଼ହ୍ନଟ କରିଥିଲେ l

ଶାୟା କ୍ୟାନ୍ସରରୁ ରକ୍ଷା ପାଇବାକୁ ହେଲେ ଶାୟାର ନାଡା ଢିଲା ବାନ୍ଧିବା ଆବଶ୍ୟକ l

ଭୁବନେଶ୍ୱର : ଭୁବନେଶ୍ୱର ୟୁନିଟ୍‌-୧ସ୍ଥିତ ମଦର୍ସ ପବ୍ଲିକ ସ୍କୁଲ ପକ୍ଷରୁ ସ୍ଥାନୀୟ ଉତ୍କଳ ମଣ୍ଡପଠାରେ ଚଳିତ ନଭେମ୍ବର ୮ ତାରିଖ ଦିନ ଅତ୍ୟଧିକ ଉତ୍ସାହର ସହ ଏହାର ବାର୍ଷିକ ଦିବସ ପାଳନ କରାଯାଇଛି । ଏହି କାର୍ଯ୍ୟକ୍ରମର ବିଷୟବସ୍ତୁ ଥିଲା ‘ଅଙ୍କୁରମ୍‌’ ଯାହାର ଅର୍ଥ ହେଉଛି ବଡ୍ ବା ଅଙ୍କୁର, ଯେଉଁଠାରେ ଜ୍ଞାନ ଅଙ୍କୁରିତ ହୋଇଥାଏ ଏବଂ ମାନବଜାତିର ହୃଦୟରେ ଜ୍ଞାନର ଆଲୋକ ବିକଶିତ ହୋଇଥାଏ ।

ଏହି ଅବସରରେ ବିଦ୍ୟାଳୟ ନିଜର ଉତ୍କର୍ଷତାର କାହାଣୀକୁ ପ୍ରସାରିତ କରିଛି । ଛାତ୍ରଛାତ୍ରୀମାନଙ୍କୁ ବାସ୍ତବ ଦୁନିଆର ଆହ୍ୱାନର ମୁକାବିଲା କରିବାର ଦକ୍ଷତା ସହିତ ସଜ୍ଜିତ କରିବା ଏବଂ ସ୍ଥାୟୀ ବିକାଶ ଲକ୍ଷ୍ୟ ସହିତ ଜୀବନବ୍ୟାପୀ ଶିକ୍ଷଣ ଅଭିଜ୍ଞତା ଥିବା ବିଶ୍ୱନାଗରିକମାନଙ୍କ ମଧ୍ୟରେ ପରିଣତ କରିବା କାର୍ଯ୍ୟରେ ଅନୁଷ୍ଠାନର ଉତ୍କୃଷ୍ଟ ଯୋଗଦାନ ରହିଛି ।

ଏହି କାର୍ଯ୍ୟକ୍ରମ ମୁଖ୍ୟ ଅତିଥିଙ୍କ ଦ୍ୱାରା ପ୍ରଦୀପ ପ୍ରଜ୍ଜ୍ୱଳନ ସହିତ ଆରମ୍ଭ ହୋଇଥିଲା ଯେଉଁମାନଙ୍କ ମଧ୍ୟରେ ଡଃ କେ. ଶ୍ରୀନିବାସନ, ଆଂଚଳିକ ଅଧିକାରୀ/ଯୁଗ୍ମ ସଚିବ, ସେଂଟର ଅଫ୍ ଏକ୍ସିଲେନ୍ସ, ସିବିଏସ୍‌ଇ, ଭୁବନେଶ୍ୱର, ସ୍କୁଲର ପ୍ରନ୍ସିପାଲ ଓ ମେଂଟର ପୋଲି ପଟ୍ଟନାୟକ, ଭାଇସ୍ ପ୍ରିନ୍ସିପାଲ ଆଶା ଟିଆର୍‌, ନିର୍ଦ୍ଦେଶକ ଶ୍ରୀ ଶ୍ରୀଜିତ ପଟ୍ଟନାୟକ, ପରିଚାଳନା ନିର୍ଦ୍ଦେଶକ ମିନତୀ ସାବତ, ଏକାଡେମିକ୍ ସୁପର୍‌ଭାଇଜର ଅମ୍ରିତା ଚୌଧୁରୀ ଓ ଏକପର୍ଣ୍ଣା ଚାଟାର୍ଜୀ, ହେଡ୍‌ମିଷ୍ଟ୍ରେସ ସନ୍ତୋଷୀ ମହାପାତ୍ର ପ୍ରମୁଖ ସାମିଲ ଥିଲେ ।

ସ୍କୁଲର ଛାତ୍ରଛାତ୍ରୀଙ୍କ ଦ୍ୱାରା ସଙ୍ଗୀତ ପରିବେଷଣ ଏବଂ ଅର୍କେଷ୍ଟ୍ରା ଦ୍ୱାରା ଚମତ୍କାର ପ୍ରଦର୍ଶନ ସହିତ ଦର୍ଶକମାନଙ୍କୁ ସ୍ୱାଗତ କରାଯାଇଥିଲା ଯାହା ଉତ୍ସବରେ ଏକ ଜୀବନ୍ତ ସ୍ପର୍ଶ ଯୋଗ କରିଥିଲା । ଯୁବ ପ୍ରଦର୍ଶନକାରୀମାନେ ଦର୍ଶକମାନଙ୍କୁ ନିଜର ଚତୁର, ମନୋହର  କଳା ପ୍ରଦର୍ଶନ ସହ ବିମୋହିତ କରିଥିଲେ । ଏହା ଏସ୍‌ଡିଜି ସହ ସମାନ୍ତରାଳ ଭାବେ ଗୌରବମୟ କାର୍ଯ୍ୟର ମିଶ୍ର ଗଣ ମାଧ୍ୟମରେ ଏକ ନୂତନ ଓ ଉଦୀୟମାନ ଭାରତର ପ୍ରତୀକାତ୍ମକ ପ୍ରଦର୍ଶନ ଥିଲା । ଏହା ପରେ ଏକ ଚଳଚିତ୍ର ପ୍ରଦର୍ଶିତ ହୋଇଥିଲା ଯାହା ବିଗତ ବର୍ଷଗୁଡିକରେ ସ୍କୁଲର ସ୍ମରଣୀୟ କାର୍ଯ୍ୟକ୍ରମ ଓ ସଫଳତାଗୁଡିକର ଏକ ଝଲକ ଦେଖାଇଥିଲା ।

ମୁଖ୍ୟ ଅତିଥି ଡଃ କେ. ଶ୍ରୀନିବାସନ ଏଭଳି ସାଂସ୍କୃତିକ ମହୋତ୍ସବର ମହତ୍ୱକୁ ହାଇଲାଇଟ୍ କରିଥିଲେ ଏବଂ ସମସ୍ତ ଅଂଶଗ୍ରହଣକାରୀଙ୍କୁ ‘ଅଙ୍କୁରମ୍‌’ର ମହତ୍ୱକୁ ଧାରଣ କରିବା କ୍ଷେତ୍ରରେ ସେମାନଙ୍କର ଚମତ୍କାର ପ୍ରୟାସ ପାଇଁ ପ୍ରଶଂସା କରିଥିଲେ

ସେ ଆହୁରି ମଧ୍ୟ କହିଥିଲେ ଯେ, ଏହା ସ୍କୁଲର ଚାରି କାନ୍ଥ ବାହାରେ ସେମାନଙ୍କର ସୃଜନଶୀଳତାକୁ  ନୂଆ ରୂପ ଦେବା ପାଇଁ ଏକ ମାଧ୍ୟମ । ଏହି ଶୁଭ ଅବସରରେ  ସ୍କୁଲର ବାର୍ଷିକ ପତ୍ରିକା ‘ପ୍ରକୃତି’ର ଉନ୍ମୋଚନ କରାଯାଇଥିଲା । ସମ୍ମାନିତ ପ୍ରିନ୍ସିପାଲ ତଥା ମେଂଟର ପୋଲି ପଟ୍ଟନାୟକ ସ୍କୁଲର ବାର୍ଷିକ ରିପୋର୍ଟ ଉପସ୍ଥାପନ କରିଥିଲେ । ନିଜ ଅଭିଭାଷଣରେ ପ୍ରିନ୍ସିପାଲ କହିଥିଲେ, “ଏହା କେବଳ ପୁରସ୍କାର ପ୍ରାପ୍ତ ଛାତ୍ରଛାତ୍ରୀଙ୍କ ପାଇଁ ନୁହେଁ ବରଂ ସ୍କୁଲର ସମସ୍ତ ଶିକ୍ଷକମାନଙ୍କ ପାଇଁ ଏକ ଗର୍ବର ମୁହୂର୍ତ ଅଟେ ଯିଏକି ଉତ୍କର୍ଷତାର ବିରାସତକୁ ଆଗକୁ ବଢାଇବା ଦିଗରେ ଏହି ଗୌରବ ଆଣିବା ଲାଗି ସେମାନଙ୍କ ସହ ପ୍ରତ୍ୟେକ ପର୍ଯ୍ୟାୟରେ ମିଳିତ ଭାବେ କାର୍ଯ୍ୟ କରିଛନ୍ତି । ସେ ସଫଳତା ହାସଲ କରିଥିବା ଛାତ୍ରଛାତ୍ରୀଙ୍କ ଆଗ୍ରହକୁ ପ୍ରଶଂସା କରିଥିଲେ ଏବଂ ଗୁରୁତ୍ୱ ଦେଇଥିଲେ ଯେ, ଏଭଳି ବିଶାଳ ସଫଳତା ସ୍କୁଲ ପାଇଁ କାର୍ଯ୍ୟ କରୁଥିବା ଟିମ୍‌ର ପ୍ରତ୍ୟେକ ସଦସ୍ୟଙ୍କ ମିଳିତ ଓ ଏକତ୍ରିତ ପ୍ରୟାସର ଫଳ । ସ୍କୁଲର ନିର୍ଦ୍ଦେଶକ ଶ୍ରୀଜିତ ପଟ୍ଟନାୟକ ସମସ୍ତ ଆଚିଭର୍ ଓ ଅଂଶଗ୍ରହଣକାରୀଙ୍କ ଚମତ୍କାର ପ୍ରଦର୍ଶନକୁ ପ୍ରଶଂସା କରିଥିଲେ ଯାହା ‘ଅଙ୍କୁରମ୍‌’ର ମହତ୍ୱକୁ କ୍ୟାପ୍‌ଚର କରିଥିଲା । ପରିଚାଳନା ନିର୍ଦ୍ଦେଶକ ମିନତୀ ସାବତ ମଧ୍ୟ ସଫଳ ଛାତ୍ରଛାତ୍ରୀଙ୍କ ପ୍ରୟାସକୁ ପ୍ରଶଂସା କରିଥିଲେ ଏବଂ ସେମାନଙ୍କୁ ନିଜର ଭବିଷ୍ୟତର ଉଦ୍ୟମଗୁଡିକରେ ସଫଳ ହେବା ପାଇଁ ପ୍ରୋତ୍ସାହିତ କରିଥିଲେ ।

ଏହି ଚମତ୍କାର ସନ୍ଧ୍ୟାରେ ସମ୍ମାନିତ ପ୍ରିନ୍ସିପାଲ ତଥା ମେଂଟର ପୋଲି ପଟ୍ଟନାୟକ ମୁଖ୍ୟ ଅତିଥି ଡଃ କେ. ଶ୍ରୀନିବାସନଙ୍କୁ ସମ୍ବର୍ନ୍ଧନା  ଦେଇଥିଲେ ।

ଭୁବନେଶ୍ୱର: ଆମର ଅଧିକାଂଶ ଚାଷୀ କ୍ଷୁଦ୍ର, ମଧ୍ୟମ ଅଥବା ଭୂମିହୀନ ବର୍ଗର ଅଟନ୍ତି। କୃଷକମାନଙ୍କ ରୋଜଗାର ବୃଦ୍ଧି ପାଇଁ ସେମାନଙ୍କ ଆର୍ଥିକ ସ୍ବଚ୍ଛଳତା ସକାଶେ ପଶୁ ପାଳନ ସବୁଠାରୁ ପ୍ରକୃଷ୍ଟ ମାଧ୍ୟମ। କୃଷି କାର୍ଯ୍ୟ ସହିତ ଗାଇ, ଛେଳି, ମେଣ୍ଢା ଓ ମାଛ ଚାଷ ଆଦି କାର୍ଯ୍ୟରେ ସମ୍ପୃକ୍ତ ରହିଲେ ସେମାନେ ସ୍ବାବଲମ୍ବୀ ହୋଇପାରିବେ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଓଡିଶା ରାଜ୍ୟ ଅଣଗେଜେଟେଡ ପ୍ରାଣୀ ଚିକିତ୍ସା ବୈଷୟିକ କର୍ମଚାରୀ ସଂଘର ୨୩ତମ ସାଧାରଣ ଅଧିବେଶନ ଅବସରରେ କହିଛନ୍ତି।

ଭୁବନେଶ୍ବର ଜୟଦେବ ଭବନ ଠାରେ ଏହି ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ କହିଥିଲେ ଯେ ରାଜ୍ୟର ପ୍ରାଣୀ ସମ୍ପଦର ବିକାଶ କ୍ଷେତ୍ରରେ ପ୍ରାଣୀ ଚିକିତ୍ସା ବିଭାଗର କର୍ମଚାରୀ ମାନଙ୍କର ଗୁରୁତ୍ବପୂର୍ଣ୍ଣ ଅବଦାନ ରହିଛି। ଗ୍ରାମାଞ୍ଚଳଠୁ ଆରମ୍ଭ କରି ସହରାଞ୍ଚଳ ପର୍ଯ୍ୟନ୍ତ ବିଶେଷ କରି ପ୍ରାକୃତିକ ବିପର୍ଯ୍ୟୟ ସମୟରେ ପ୍ରାଣୀଧନ ନିରୀକ୍ଷକ ଓ ବିଭାଗୀୟ ଅନ୍ୟ କର୍ମଚାରୀ ମାନେ ନିରନ୍ତର ଭାବେ ପ୍ରାଣୀ ସେବା ଯୋଗାଇଥାନ୍ତି। ଆମ ଏହି ବିଭାଗର କର୍ମଚାରୀ ମାନଙ୍କ ବୈଷୟିକ ଜ୍ଞାନ ଚାଷୀ ଭାଇ ମାନଙ୍କ ରୋଜଗାର ବୃଦ୍ଧି ପାଇଁ ଖୁବ୍ ସହାୟକ ହୋଇଥାଏ। ପ୍ରାଣୀ ପାଳନ ମନୁଷ୍ୟ ସମାଜର ସବୁଠାରୁ ପୁରାତନ ଜୀବିକା। ଆଜି ସମୟ ବଦଳି ଯାଇଛି, ମଣିଷ ସମାଜ ବର୍ତ୍ତମାନ ବିଭିନ୍ନ ପ୍ରକାର ବୃତ୍ତିଗତ ବ୍ୟବସାୟରେ ଜଡିତ ହୋଇ ଆଗକୁ ବଢୁଛି। କୃଷି ଓ ପଶୁ ପାଳନ କ୍ଷେତ୍ରରେ ଯୁବବର୍ଗଙ୍କ ମଧ୍ୟରେ ଫାର୍ମ ହାଉସ କରିବାର ଆଗ୍ରହ ବୃଦ୍ଧି ପାଉଛି। ଯଦି ଯୁବ ସମାଜ କୃଷି ଓ ପଶୁ ପାଳନ କ୍ଷେତ୍ରକୁ ବ୍ୟାପକ ଭାବେ ଆସିବେ ଏବଂ ଏହାକୁ ନିଜର ମୁଖ୍ୟ ବୃତ୍ତି ଭାବେ ଗ୍ରହଣ କରିବେ ତେବେ କୃଷି ଓ କୃଷକଙ୍କ ଆର୍ଥିକ ସ୍ଥିତିରେ ଏକ ବୈପ୍ଲବିକ ପରିବର୍ତ୍ତନ ଆସିବ ବୋଲି ମୁଖ୍ୟମନ୍ତ୍ରୀ କହିଥିଲେ।

ମୁଖ୍ୟମନ୍ତ୍ରୀ ଉପସ୍ଥିତ କର୍ମଚାରୀ ମାନଙ୍କୁ ଉତ୍ସାହିତ କରି କହିଥିଲେ ଯେ ଆପଣ ମାନେ ଆପଣଙ୍କ ବୃତ୍ତିକୁ ଏକ ସାଧାରଣ ଚାକିରୀ ବୋଲି ଭାବନ୍ତୁ ନାହିଁ। ଆପଣ ମାନଙ୍କ ଜ୍ଞାନ ଯେପରି ଲୋକଙ୍କ ଉପକାରରେ ଆସିବ, ସେମାନେ ଯେପରି ପଶୁ ପାଳନ ବୃତ୍ତିକୁ ଏକ ଲାଭ ଜନକ ତଥା ସମ୍ମାନଜନକ ବୃତ୍ତି ଭାବେ ଗ୍ରହଣ କରିବେ ସେଥିପାଇଁ ଉଦ୍ୟମ କରନ୍ତୁ। ଆପଣ ମାନେ ସରକାରଙ୍କ ଯୋଜନାକୁ ଲୋକଙ୍କ ପାଖେ ପହଞ୍ଚାନ୍ତୁ ଏବଂ ସେମାନଙ୍କୁ ଏ ଦିଗରେ ପ୍ରୋତ୍ସାହିତ କରନ୍ତୁ। ରାଜ୍ୟ ସରକାରଙ୍କ ପକ୍ଷରୁ ପ୍ରାଣୀ ପାଳନ ଉଦ୍ୟୋଗ ପ୍ରତିଷ୍ଠା ପାଇଁ ଅନେକ ସହାୟତା ଓ ରିହାତିର ବ୍ୟବସ୍ଥା କରାଯାଇଛି। ଆମ ଯୋଜନା ସଠିକ୍ ଭାବେ କାର୍ଯ୍ୟକାରୀ ହେଲେ ସାଧାରଣ ଲୋକ ଓ ଯୁବବର୍ଗ ଏ କ୍ଷେତ୍ର ପ୍ରତି ଅଧିକ ଆକର୍ଷିତ ହେବେ।

ପ୍ରାଣୀ ସମ୍ପଦର ବିକାଶ ପାଇଁ ଚଳିତ ବର୍ଷ ବଜେଟ୍‌ରେ ୬୯୭ କୋଟି ଟଙ୍କା ରଖାଯାଇଛି। ଆମ ନୂଆ ସରକାରଙ୍କ ଦ୍ବାରା ନୂତନ ଯୋଜନା ମଧ୍ୟ ଆରମ୍ଭ ହେବାକୁ ଯାଉଛି। ରାଜ୍ୟରେ ଦୁଗ୍ଧ ଉତ୍ପାଦନ ବୃଦ୍ଧି ପାଇଁ ମୁଖ୍ୟମନ୍ତ୍ରୀ କାମଧେନୁ ଯୋଜନା ଏବଂ ପ୍ରାଣୀ ମଙ୍ଗଳ କାର୍ଯ୍ୟକ୍ରମ ପାଇଁ ମୁଖ୍ୟମନ୍ତ୍ରୀ ପ୍ରାଣୀ କଲ୍ୟାଣ ଯୋଜନା ଆରମ୍ଭ କରାଯିବ ବୋଲି ସେ କହିଥିଲେ।

ମୁଖ୍ୟମନ୍ତ୍ରୀ କହିଥିଲେ ଯେ ଆପଣ ମାନେ ଡବଲ ଇଞ୍ଜିନ ସରକାର ଦେଇଛନ୍ତି। ଆମକୁ ମଧ୍ୟ ବିକାଶକୁ ଡବଲ ସ୍ପିଡ୍‌ରେ କରିବାକୁ ପଡିବ। ଏ ବିଭାଗକୁ ଆହୁରି ସଶକ୍ତ କରିବାକୁ ପଡିବ। ଚାଷୀ ମାନଙ୍କୁ ଆଗକୁ ନେବାକୁ ପଡିବ। ଏଥିପାଇଁ ଆପଣ ମାନଙ୍କ ସହଯୋଗ ଆବଶ୍ୟକ।

କାର୍ଯ୍ୟକ୍ରମରେ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗର ମନ୍ତ୍ରୀ ଗୋକୁଳା ନନ୍ଦ ମଲ୍ଲିକ ଉଦ୍‌ବୋଧନ ଦେଇ କହିଥିଲେ ଯେ ଆପଣ ମାନେ ଜଣେ ଜଣେ ପ୍ରାଣୀ ସେବକ ଭାବେ ସମାଜରେ ନିଜର ପରିଚୟ ସୃଷ୍ଟି କରିପାରିଛନ୍ତି। କୃଷି ପରେ ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗ ରାଜ୍ୟର ଅର୍ଥନୈତିକ ବିକାଶରେ ଗୁରୁତ୍ବପୂର୍ଣ୍ଣ ଭୂମିକା ନେଉଛି। ଗ୍ରାମାଞ୍ଚଳର ଗରିବ କୃଷକଙ୍କ ଅର୍ଥନୈତିକ ଅଭିବୃଦ୍ଧି ସହିତ ସମାଜର ଶେଷ ଧାଡିରେ ରହିଥିବା ଲୋକଙ୍କୁ ମୁଖ୍ୟସ୍ରୋତରେ ସାମିଲ କରିବାରେ ଆପଣମାନଙ୍କର ବଳିଷ୍ଠ ଯୋଗଦାନ ରହିଛି। ୨୦୩୬ ବିକଶିତ ଓଡିଶା ଗଠନର ମୁଖ୍ୟ ବିନ୍ଧାଣୀ ହେବେ ଆପଣ ମାନେ। ଆମର ଏହି ବିକଶିତ ଓଡିଶା ଗଠନ ଲକ୍ଷ୍ୟ ପୂରଣ ପାଇଁ ଆସନ୍ତୁ ଆମେ ସମସ୍ତେ ମିଳି ମିଶି କାମ କରିବା ବୋଲି ସେ କହିଥିଲେ।

କାର୍ଯ୍ୟକ୍ରମରେ ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା ୪ଜଣ ସଫଳ ଚାଷୀଙ୍କୁ ମୁଖ୍ୟମନ୍ତ୍ରୀ ଏହି ଅବସରରେ ସମ୍ମାନିତ କରିଥିଲେ।

ବିଧାୟକ ତଥା ଅଭ୍ୟର୍ଥନା କମିଟିର ଅଧ୍ୟକ୍ଷ ଶ୍ରୀ ଶାରଦା ପ୍ରସାଦ ପ୍ରଧାନ କାର୍ଯ୍ୟକ୍ରମରେ ସ୍ବାଗତ ଭାଷଣ ଦେଇଥିଲେ। ସଂଘର ସାଧାରଣ ସମ୍ପାଦକ ଶ୍ରୀ ବସନ୍ତ କୁମାର ସାହୁ ସମ୍ପାଦକୀୟ ବିବରଣୀ ପାଠ କରିଥିଲେ ଏବଂ ସଭାପତି ଶ୍ରୀ ଉପେନ୍ଦ୍ର ନାଥ ରଣା ଧନ୍ୟବାଦ ଅର୍ପଣ କରିଥିଲେ।