ମୋରଡା ୨୭/୪ : ବିଜେପି ଅଧ୍ୟକ୍ଷ ଅମିତ ଶାହା ମୟୁରଭଞ୍ଜ ମୋରଡାରେ ଦଳର ବିଜୟ ସଂକଳ୍ପ ସମାବେଶରେ ଯୋଗ ଦେଇ ଦଳୀୟ କର୍ମୀଙ୍କୁ ଉଦବୋଧନ ଦେଇଛନ୍ତି ।
ଅମିତ କହିଛନ୍ତି ଯେ, ସାରା ଦେଶରେ ମୋଦୀ ଲହର ଦେଖାଦେଇଛି । ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବା ନିଶ୍ଚିତ । ମୟୁରଭଞ୍ଜବାସୀ ମଧ୍ୟ ମୋଦୀଙ୍କୁ ପ୍ରଧାନମନ୍ତ୍ରୀ କରିବା ପାଇଁ ଚାହୁଁଛନ୍ତି । ଦୁର୍ନୀତିଗ୍ରସ୍ତ ବିଜେଡି ସରକାରରୁ ଏହି ଅଂଚଳବାସୀ ଫିଙ୍ଗିବେ । ମୋଦୀଙ୍କୁ ଓଡିଶାର ବିକାଶ ପାଇଁ ମଜବୁତ ହାତ ଦରକାର । ଅଣଓଡିଆ ମୁଖ୍ୟମନ୍ତ୍ରୀ ଦରକାର ନାହିଁ । ଏହି ରାଲିକୁ ଦେଖି ବିଜେଡିକୁ ଚଳାଉଥିବା ସରକାରୀ ବାବୁଙ୍କ ନିନ୍ଦ ଛାଡି ଯାଇଛି । ସେ ଜାଣିଛନ୍ତି ଏଠାରେ ବିଜେପି ସରକାର ହେବ । ବିଜେପି ସରକାର ଲୋକଙ୍କ ମୌଳିକ ଅସୁବିଧା ଦୂର କରିଛି । ମହିଳାଙ୍କୁ ଗ୍ୟାସ ମିଳିଛି । ୮କୋଟି ଘରେ ଶୌଚାଳୟ ପହଁଚିଛି । ଗରିବଙ୍କ ପାଇଁ ବ୍ୟାଙ୍କ ଆକାଉଂଟ ଖୋଲାଯାଇଛି । ମୋଦୀ ସରକାର ସାରାଦେଶରେ ଗରିବଙ୍କ ପାଇଁ ଆୟୁଷ୍ମାନ ଯୋଜନା ଲାଗୁ କଲେ । ୨୩ଲକ୍ଷ ବ୍ୟକ୍ତି ଏଥିରେ ଉପକୃତ ହୋଇ ସାରିଲେଣି । କିନ୍ତୁ ଓଡିଶା ସରକାର ମୋଦୀଙ୍କ ଲୋକପ୍ରିୟତା ଭୟରେ ଏହାକୁ ଲାଗୁ କରୁନାହାନ୍ତି । ମୋଦୀ ସରକାରରରେ ଦେଶ ସୁରକ୍ଷିତ । ପୁଲୱାମା ଆକ୍ରମଣ ପରେ ପାକିସ୍ତାନକୁ ଦ୍ରୁଢ ଜବାବ ଦିଆଗଲା । ଏହା ହେଉଛି ମୋଦୀଙ୍କ ୫୬ ଇଂଚର ଛାତି । କାଶ୍ମୀର ଭାରତ ମାତାର ମୁକୁଟ । ଏହାକୁ କେହି ନେଇ ପାରିବେ ନାହିଁ ।
ସେ କହିଛନ୍ତି ଯେ, ମୋଦୀ ସରକାର ରାଜ୍ୟ ପାଇଁ ଡିଏମଏଫ ଫଣ୍ଡ ରଚନା କରିଛନ୍ତି । ଆଦିବାସୀଙ୍କ କଲ୍ୟାଣ ପାଇଁ ୬୦୦୦କୋଟି ମିଳିଛି ।ସାଗରମାଳା ପ୍ରକଳ୍ପ ଆରମ୍ଭ କରାଗଲା । ରାସ୍ତା, ବନ୍ଦର ସବୁ ହୋଇଛି । ବିଜେଡି ସରକାର ଚିଟଫଣ୍ଡ ଘୋଟଲାକାରୀଙ୍କୁ ସୁରକ୍ଷା ଦେଉଛି । ବିଜେଡି ନେତା ଓଡିଶାବାସୀଙ୍କ ହଜାର ହଜାର କୋଟି ଟଙ୍କା ଖାଇଯାଇଛନ୍ତି । ରାଜ୍ୟରେ ବିଜେପି ସରକାର ହେଲେ ଏମାନେ ଜେଲ୍ ଯିବେ । ଓଡିଶା ପ୍ରାକୃତିକ ସଂପଦରେ ଭରପୁର । ଖଣି ଦୁର୍ନୀତି ପାଇଁ ଓଡିଶାବାସୀ ଆଜି ଗରିବ । ବିଜେପି ସରକାର ଆସିଲେ ଦୁର୍ନୀତି ହଟିବ । ରାଜ୍ୟରେ ରୋଜଗାରର ସୁଯୋଗ ରହିଛି । ବିଜେପି ସରକାରଙ୍କ ଉପରେ ଆକ୍ରମଣ ହେଉଛି । କିନ୍ତୁ ବିଜେପି ଡରିବ ନାହିଁ । ବିଜେଡିର ଦିନ ସରି ଆସୁଛି । ବିଜେପି ସରକାର ଆସୁଛି ।