ଭୁବନେଶ୍ୱର:ସାରା ଓଡିଶା ପାଇଁ ଆଜି ଆନନ୍ଦ ଓ ଉତ୍ସବର ଦିନ। ଖୁସିର ଦିନ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ରାଉରକେଲା ଠାରେ ବିଶ୍ବର ସର୍ବବୃହତ ହକି ଷ୍ଟାଡିଅମ, ବିର୍ସା ମୁଣ୍ଡା ହକି ଷ୍ଟାଡିଅମ ଆନୁଷ୍ଠାନିକ ଭାବେ ଜନସାଧାରଣଙ୍କ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି।

ବିଶ୍ଵ କ୍ରୀଡା ଇତିହାସ ରେ ଯୋଡି ହେଲା ଏକ ସ୍ଵର୍ଣ୍ଣିମ ଅଧ୍ୟାୟ. ହକିକୁ ଭଲ ପାଉଥିବା ସମସ୍ତଙ୍କୁ, ଖେଳାଳୀ, ସାଧାରଣ ଜନତା, ଓଡିଶାର ହକିପ୍ରେମୀ ଦେଶର ହକି କ୍ରୀଡାବିତ୍‌ ସମସ୍ତଙ୍କ ଉଦ୍ଦେଶ୍ୟରେ ଏହି ଷ୍ଟାଡିଅମକୁ ମୁଁ ଉତ୍ସର୍ଗ କରୁଛି ବୋଲି ମୁଖ୍ୟମନ୍ତ୍ରୀ କହିଥିଲେ ଏବଂ ହକିକୁ ଭଲ ପାଉଥିବା ସମସ୍ତଙ୍କୁ ହକି ବିଶ୍ଵ କପ୍ ଭବ୍ୟ ଉତ୍ସବରେ ସାମିଲ ହେବା ପାଇଁ ନିମନ୍ତ୍ରଣ କରିଥିଲେ।

ବିଶ୍ଵ କପ୍ ଜିତିଲେ ପ୍ରତି ଭାରତୀୟ ଖେଳାଳିଙ୍କୁ ଏକ କୋଟି ଟଙ୍କା ଦିଆଯିବ ବୋଲି ଏହି ଅବସରରେ ମୁଖ୍ୟମନ୍ତ୍ରୀ ଘୋଷଣା କରିଥିଲେ .

ଉପସ୍ଥିତ ଜନସାଧାରଣ ଓ କ୍ରୀଡାପ୍ରେମୀ ମାନଙ୍କୁ ଉଦ୍‌ବୋଧନ ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ ଏହା ହେଉଛି ଓଡିଶାର ସମଗ୍ର ଦେଶକୁ ସବୁଠାରୁ ଶ୍ରେଷ୍ଠ ଉପହାର। ଏହା ଭାରତକୁ ହକି କ୍ଷେତ୍ରରେ ଏକ ବଡ ଶକ୍ତି ଭାବରେ ଗଢି ତୋଳିବ ଏବଂ ଆଗାମୀ ଅନେକ ଦଶକ ପର୍ଯ୍ୟନ୍ତ ହକି ଖେଳରେ ଦେଶ ଏକ ମଜବୁତ ଦଳ ଭାବରେ ପ୍ରତିଷ୍ଠା ଲାଭ କରିବ।

ମୁଖ୍ୟମନ୍ତ୍ରୀ କହିଥିଲେ ଯେ ହକିର ସ୍ବର୍ଣ୍ଣକ୍ଷେତ୍ର ସୁନ୍ଦରଗଡରେ ଆଜି ବିଶ୍ବର ସବୁଠାରୁ ବଡ ଷ୍ଟାଡିଅମ ଓଡିଶା ମାଟିର ଗୌରବ ଗାନ କରୁଛି। ଏ ଷ୍ଟାଡିଅମ ସାରା ବିଶ୍ବ ପାଇଁ ହକିର ମୁଖ୍ୟ କେନ୍ଦ୍ର ହୋଇରହିବ ଏବଂ ଦେଶର ପ୍ରମୁଖ ଟିମ୍‌ ମାନଙ୍କୁ ସେମାନଙ୍କ ପ୍ରଦର୍ଶନ ପାଇଁ ସୁଯୋଗ ଦେଇଚାଲିବ। ଆମର ଏହି ଉଦ୍ୟମ ଦେଶର ଯୁବ ଖେଳାଳୀ ମାନଙ୍କୁ ପ୍ରେରଣା ଦେବ ବୋଲି ସେ କହିଥିଲେ। ଦେଶରେ ଅନେକ ଚମ୍ପିଆନ ସୃଷ୍ଟି କରିବ ଏବଂ ଦେଶ ତଥା ରାଜ୍ୟର ଗୌରବ ବୃଦ୍ଧି କରିଚାଲିବ ବୋଲି ସେ କହିଥିଲେ।

ମହାପ୍ରଭୁ ଙ୍କ ଆଶୀର୍ବାଦ ଓ ସମସ୍ତଙ୍କ ସଦିଚ୍ଛା ଓ ଭଲପାଇବା ଯୋଗୁ ଆମର ସ୍ବପ୍ନ ସାକାର ହୋଇଛି ବୋଲି ପ୍ରକାଶ କରି ମୁଖ୍ୟମନ୍ତ୍ରୀ କହିଥିଲେ ସବୁକ୍ଷେତ୍ରରେ ଶ୍ରେଷ୍ଠ ହେବାର ଉଦ୍ୟମର ଏହା ପ୍ରତିଫଳନ। ଦେଶର କ୍ରୀଡା ଭିତ୍ତିଭୂମିର ବିକାଶ କ୍ଷେତ୍ରରେ ଏହି ଷ୍ଟାଡିଅମ ଓଡିଶାର ଛବିକୁ ଆହୁରି ଉଜ୍ଜଳ କରିଛି ବୋଲି ସେ କହିଥିଲେ।

ମୁଖ୍ୟମନ୍ତ୍ରୀ କହିଥିଲେ ଯେ ଆଗାମୀ ଅନେକ ଯୁଗ ପର୍ଯ୍ୟନ୍ତ ଏହି ଷ୍ଟାଡିଅମ ଆମର ମୁକୁଟମଣି ହୋଇ ହକି ପ୍ରତି ଭାରତୀୟ ମାନଙ୍କର ଭାବାବେଗ ଓ ଭଲପାଇବାକୁ ପରିପ୍ରକାଶ କରିଚାଲିବ। ଏହା ଭାରତୀୟ ହକିର ଏନ୍ତୁଡିଶାଳା ହୋଇ ରହିବ।

ଏହି ଅବସରରେ ମୁଖ୍ୟମନ୍ତ୍ରୀ ମହାନ ସଂଗ୍ରାମୀ ତଥା କିମ୍ବଦନ୍ତୀ ପୁରୁଷ ବିର୍ସା ମୁଣ୍ଡାଙ୍କ ପ୍ରତି ତାଙ୍କର ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।

120 କୋଟି ଟଙ୍କା ଖର୍ଚ୍ଚରେ ରେକର୍ଡ ପନ୍ଦର ମାସ ସମୟ ମଧ୍ୟରେ ଏହି ଷ୍ଟାଡିୟମ୍ ନିର୍ମିତ ହୋଇଛି .

ଏହି କାର୍ଯ୍ୟକ୍ରମରେ କ୍ରୀଡା ମନ୍ତ୍ରୀ ଶ୍ରୀ ତୁଷାରକାନ୍ତ ବେହେରା ,ହକି ଇଣ୍ଡିଆର ସଭାପତି ଦିଲୀପ ତିର୍କୀ ,5T ସଚିବ କାର୍ତିକ ପାଣ୍ଡିଆନ୍ ଓ ହକି ଇଣ୍ଡିଆ ର କର୍ମକର୍ତ୍ତା ମାନେ ଉପସ୍ଥିତ ଥିଲେ.
ଇଣ୍ଡିଆ A ଓ ଇଣ୍ଡିଆ B team ମଧ୍ୟରେ ଉଦଘାଟନୀ ମ୍ଯାଚ କୁ ମୁଖ୍ୟମନ୍ତ୍ରୀ ଏହି ଅବସରରେ ଉଦଘାଟନ କରିଥିଲେ.

ମୁଖ୍ୟମନ୍ତ୍ରୀ ଆଜି ରାଉରକେଲାରେ ପହଞ୍ଚିବା ପରେ ବିର୍ସା ମୁଣ୍ଡା ହକି ଷ୍ଟାଡିଅମ ପରିଦର୍ଶନ କରି ସେଠାରେ ଭାରତୀୟ ହକି ଟିମ୍‌ର ଖେଳାଳୀ ମାନଙ୍କ ସହିତ ବାର୍ତ୍ତାଳାପ କରିଥିଲେ। ଏହାପରେ ଅପରାହ୍ନରେ ମୁଖ୍ୟମନ୍ତ୍ରୀ ସୁନ୍ଦରଗଡ ମେଡିକାଲ କଲେଜ ଉଦ୍‌ଘାଟନ କରିବା ସହିତ ସୁନ୍ଦରଗଡ ପାଇଁ ଅନେକ ବିକାଶମୂଳକ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ରାଉରକେଲା ସହରରେ ମୋ ବସ୍‌ ଚଳାଚଳର ଶୁଭାରମ୍ଭ ମଧ୍ୟ କରିଥିଲେ। ଏହାପରେ ସେ ହକି ଷ୍ଟାଡିଅମ ଉଦ୍‌ଘାଟନ କରିଥିଲେ।

ନୂଆଦିଲ୍ଲୀ: ବିଶ୍ୱସ୍ତରୀୟ ଚେସ ଟୁର୍ଣ୍ଣାମେଣ୍ଟ ରେ ଖେଳାଳୀଙ୍କ ସାଂଘାତିକ ଠକାମୀର ସୂଚନା ମିଳିବାରେ ଲାଗିଛି।

ଗତ ସେପ୍ଟେମ୍ବର ୪ ତାରିଖରେ ପାଞ୍ଚ ଥରର ବିଶ୍ଵ ଚେସ ଚମ୍ପିୟାନ ମାଗନସ କାର୍ଲସେନ ସେଣ୍ଟ ଲୁଇସ ଠାରେ ଅନୁଷ୍ଠିତ ୫ ଲକ୍ଷ ଡଲାର ସୀନକ୍ୟୁଫିଲଡ଼ କପ ପ୍ରତିଯୋତାରୁ ହଠାତ ଓହରି ଯିବା ଘଟଣା ସ୍ୱାଭାବିକ ଭାବେ ବିଶ୍ୱ ଚେସ ପ୍ରେମୀମାନଙ୍କୁ ଚକିତ କରିଥିଲା ।ଆମେରିକାର ୧୯ ବର୍ଷ ବର୍ଷୀୟ ହାନ୍ସ ନେଇମେନଙ୍କ ଠାରୁ ହରିଯିବା ପରେ ସେ ଏହି ନିଷ୍ପତ୍ତି ନେଇଥିଲେ। କୌଣସି ପ୍ରତିଯୋଗିତାରୁ ଓହରି ଯିବା ତାଙ୍କ ପାଇଁ ଏହା ପ୍ରଥମ ଘଟଣା ଥିଲା।

କାର୍ଲସେନ ଯଦିଓ ଏହି ନିଷ୍ପତ୍ତିର କାରଣ ଦର୍ଶାଇ ନଥିଲେ ତେବେ ପରଦିନ ଏକ ଭିଡ଼ିଓ ତାଙ୍କ ଟ୍ୱିଟରରେ ପୋଷ୍ଟ କରିଥିଲେ। ଏହି ଭିଡ଼ିଓରେ ପ୍ରସିଦ୍ଧ ଫୁଟବଲ ମ୍ୟାନେଜର ଯୋଶୀ ମେରୀନୋ ଯେକି ବର୍ତମାନ ଇଟଳିଆନ କ୍ଲବ ରୋମାର ହେଡ କୋଚ ଅଛନ୍ତି ସେ ” ମୁଁ ଯଦି ମୁହଁ ଖୋଲିବି ମୁଁ ବଡ଼ ଅଡୁଆରେ ପଡିଯିବି। ବଡ଼ ଅର୍ଥ ବଡ ଅଡୁଆରେ ପଡିଯିବି”।

ଚେସ ଖେଳାଳୀମନେ ଭାବୁଥିଲେ ଯେ କାର୍ଲସେନ ବୋଧେ ନେଇମେନ ଖେଳରେ ଠକାମୀ କରୁଥିବାର ସନ୍ଦେହ କରି ଏଭଳି ପଦକ୍ଷେପ ନେଇଛନ୍ତି।

ତେବେ ସେପ୍ଟେମ୍ବର ୬ ତାରିଖରେ ନେଇମେନ ଏକ ବିସ୍ଫୋରକ ମନ୍ତବ୍ୟ ଦେଇଥିଲେ। “ମୋର ସ୍ୱଚ୍ଛତା ପ୍ରମାଣ କରିବା ପାଇଁ ମୁଁ ସମ୍ପୂର୍ଣ୍ଣ ଉଲଗ୍ନ ହୋଇ ଖେଳିବାକୁ ପ୍ରସ୍ତୁତ ଅଛି।” ତେବେ ସେ ସ୍ୱୀକାର କରିଥିଲେ ଯେ ୧୨ ବର୍ଷ ଏବଂ ୧୬ ବର୍ଷ ବୟସରେ ସେ ଖେଳରେ ଠକେଇ କରିଥିଲେ।

ଏହି ଘଟଣା ପରେ ଚେସ ଡ଼ଟ କମ ର ବିଶ୍ୱ ଚେସ ଚମ୍ପିୟାନସିପ ଟୁର୍ଣ୍ଣାମେଣ୍ଟ ନେଇମେନଙ୍କ ନିମନ୍ତ୍ରଣ ବାତିଲ କରିଦେଇଛନ୍ତି।

ଚେସ ଖେଳରେ ଠକେଇ ଘଟଣାର ଏକ ଲମ୍ବା ଇତିହାସ ରହିଛି।

ଖେଳାଳୀ ବାରମ୍ବାର ପରିସ୍ରାଗାର ଦୌଡ଼ିବା ଠକାଇର ଏକ କାରଣ। ଟଏଲେଟରେ ପରବର୍ତୀ ଗୋଟି ଚାଳନାର ପରାମର୍ଶ ନେବା ଘଟଣା ଏକଦା ଜଣାଶୁଣା ଥିଲା। ୨୦୦୫ ବିଶ୍ଵ ଚମ୍ପିୟାନସିପ ମ୍ୟାଚ ବେଳେ ଭେସଲିନ ଟୋପାଲାଭ ଅଭିଯୋଗ କରିଥିଲେଯେ ପ୍ରତିଦ୍ୱନ୍ଦୀ ଖେଳାଳୀ ଭ୍ଲାଡ଼ କାର୍ମନିକ ଲାଭାଟୋରୀରେ ବସି ଖେଳ ବିଶ୍ଳେଷଣ କରୁଛନ୍ତି। ଏହି ଘଟଣା ଚେସ ଖେଳ ଇତିହାସରେ ୨୦୦୫ ଟଏଲେଟଗେଟ ଭାବେ କୁଖ୍ୟାତ।

ଶୀତଳ ଯୁଦ୍ଧ ସମୟରେ ସୋଭିଏତ ଖେଳାଳିମନେ ପରସ୍ପର ସହ ତାଳ ମେଳ ରଖି ପ୍ରତିପକ୍ଷକୁ ହରାଇବାର ଯୋଜନା କରୁଥିବାର ଅଭିଯୋଗ ରହିଛି।

ବର୍ତମାନ ଇଣ୍ଟରନେଟ ଯୁଗରେ ଜୋତାରେ, ଚାଷମରେ ମାଇକ୍ରୋ ଡିଭାଇସ ବ୍ୟବହାର କରି ଠକେଇ କରିବାର ଅନେକ ଅଭିଯୋଗ ରହିଛି।

କଳା ଚାଷମାରେ ଏକ ଗୁପ୍ତ ମାଇକ୍ରୋ କ୍ୟାମେରା ଲଗାଇ ଉତ୍ତର ଇଟାଲୀୟ ସହର ମିଲାନ ନିକଟସ୍ଥ ବୁସିନାସ୍କୋ ସହରର ପୂର୍ବତନ ମେୟର ଲୋରିସ କ୍ରେଡ଼ା ଏକ ଶକ୍ତିଶାଳୀ ଚେସ ସଫ୍ଟୱେରକୁ ପ୍ରତିପକ୍ଷ ର ଗୋଟି ଚାଳନାର ଫୋଟୋ ପଠାଇ ପରାମର୍ଶ ନେଉଥିଲେ। ଏହି ଘଟଣା ଧରାପଡିବା ପରେ ଲୋରିସ କ୍ରେଡ଼ାଙ୍କୁ ନିଷିଦ୍ଧ ଘୋଷଣା କରାଯାଇଥିଲା।

ବର୍ତ୍ତମାନ ଅନଲାଇନ ଚେସ ଟୁର୍ଣ୍ଣାମେଣ୍ଟ କୁ ଠକାମୀ ପ୍ରତିରୋଧ କରିବାକୁ ଆୟୋଜକ ମାନଙ୍କୁ ଅନେକ ବ୍ୟବସ୍ଥା କରିବାକୁ ପଡୁଛି।

ରାଜକୀୟ ଖେଳରେ ବର୍ତମାନ ଠକମାନଙ୍କ ରାଜତ୍ୱ ନିଶ୍ଚିତ ଭାବରେ ଚିନ୍ତାର କାରଣ।

ଭୁବନେଶ୍ୱର:/ସିନିୟର ଜାତୀୟ ଭାରୋତ୍ତୋଳନ ଚାମ୍ପିଅନସିପ୍‌ (ପୁରୁଷ ଓ ମହିଳା) ୨୦୨୧-୨୨ ଆସନ୍ତା ୧୯ରୁ ୩୧ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ଅନୁଷ୍ଠିତ ହେବ । ଏହି ପ୍ରତିଯୋଗିତାରେ ଭାରତୀୟ ରେଳବାଇ ପକ୍ଷରୁ ଦୃଢ଼ ଦାବିଦାର ଭାରୋତ୍ତୋଲନକାରୀମାନେ ଅଂଶଗ୍ରହଣ କରିବେ । ଭାରତୀୟ ରେଳବାଇର କ୍ରୀଡ଼ା ବିଭାଗ ରେଳବାଇ କ୍ରୀଡ଼ା ପ୍ରୋତ୍ସାହନ ପରିଷଦ (ଆରଏସପିବି)ର ଦକ୍ଷ ଖେଳାଳୀମାନେ ଏହି ଚାମ୍ପିଅନସିପରେ ପ୍ରତିଦ୍ୱନ୍ଦ୍ୱିତା କରିବେ ।

ଭାରତୀୟ ରେଳବାଇର ପୁରୁଷ ଦଳ ଲଗାତାର ୪ ବର୍ଷ ଧରି ଜାତୀୟ ଭାରୋତ୍ତୋଳନ ପ୍ରତିଯୋଗିତାରେ ବିଜେତା ହୋଇ ଆସୁଛି । ଅନ୍ୟପକ୍ଷରେ ଭାରତୀୟ ରେଳବାଇର ମହିଳା ଦଳ ଲଗାତାର ଦୁଇଟି ଜାତୀୟ ଚାମ୍ପିଅନସିପରେ ଟାଇଟଲ୍‌ ହାସଲ କରିଛି ।
ସୂଚନାଯୋଗ୍ୟ ଯେ ଭାରତୀୟ ରେଳବାଇ ଦେଶର ସର୍ବବୃହତ ସଂସ୍ଥା ଭାବେ କ୍ରୀଡ଼ା ପ୍ରତିଭାମାନଙ୍କୁ ନିଯୁକ୍ତି ଦେଇ ଆସୁଛି । ରେଳବାଇ କ୍ରୀଡ଼ା ପ୍ରୋତ୍ସାହନ ପରିଷଦ ନିଜର କ୍ରୀଡ଼ା ପ୍ରୋତ୍ସାହନ ଗତିବିଧି ଏବଂ ‘‘ଜାହାଁ ଖେଲ୍‌ ୱାହାଁ ରେଲ୍‌’’ (ଯେଉଁଠି ଖେଳ ସେଇଠି ରେଳ) ଲକ୍ଷ୍ୟ ନେଇ କ୍ରୀଡ଼ା ଭିତ୍ତିଭୂମି ବିକାଶ କରୁଛି । ଏହି ସଂଗଠନ କେବଳ ଭାରତୀୟ ରେଳବାଇ ନୁହେଁ ବରଂ ଦେଶର ଅନ୍ୟ କ୍ରୀଡ଼ା ପ୍ରତିଭାମାନଙ୍କୁ କ୍ରୀଡ଼ା କୌଶଳ ଶିକ୍ଷା ଦେବା ଏବଂ ସେମାନଙ୍କ ପ୍ରତିଭା ବିକଶିତ କରିବା ଲାଗି ଆବଶ୍ୟକ ବିଶ୍ୱସ୍ତରୀୟ ପ୍ରଶିକ୍ଷଣ ଏବଂ ସୁବିଧା ଯୋଗାଇ ଦେଉଛି । ରେଳବାଇର ପ୍ରାୟ ୧୦ ହଜାର କ୍ରୀଡ଼ା କର୍ମଚାରୀମାନଙ୍କ ମଧ୍ୟରୁ ପାଖାପାଖି ୩ ହଜାର କର୍ମଚାରୀ କ୍ରୀଡ଼ା ଗତିବିଧିରେ ସକ୍ରିୟ ରହିଛନ୍ତି । ଦେଶରେ ଭାରତୀୟ ରେଳବାଇ ସର୍ବାଧିକ ସଂଖ୍ୟକ ପୁରୁଷ ଓ ମହିଳା କ୍ରୀଡ଼ାବିତ୍‌ମାନଙ୍କୁ ନିଯୁକ୍ତି ଦେଇଛି ।
ଅନ୍ତର୍ଜାତୀୟ କ୍ରୀଡ଼ା ମଞ୍ଚରେ ଭାରତୀୟ ରେଳବାଇର କ୍ରୀଡ଼ାବିତ୍‌ମାନେ ଦେଶ ପାଇଁ ଗୌରବ ଆଣିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି । ରେଳବାଇ ଏ କ୍ଷେତ୍ରରେ ଏକ ରେକର୍ଡ କରିଛି । ରାଜ୍ୟଗୋଷ୍ଠୀ କ୍ରୀଡ଼ା, ଏସୀୟ କ୍ରୀଡ଼ା କିମ୍ବା ଅଲିମ୍ପିକ୍ସ, ଭାରତୀୟ ରେଳବାଇର କ୍ରୀଡ଼ାବିତ୍‌ମାନେ ଭାରତର ପ୍ରଦର୍ଶନରେ ବ୍ୟାପକ ଯୋଗଦାନ ଦେଇଥାନ୍ତି ।
ଭାରତୀୟ ରେଳବାଇ ସୃଷ୍ଟି କରିଥିବା ତାରକା ଭାରୋତ୍ତୋଳନକାରୀମାନଙ୍କ ମଧ୍ୟରେ ରହିଛନ୍ତି ସୁଶ୍ରୀ ଏସ. ମୀରାବାଇ ଚାନୁ, ଯିଏକି ଟୋକିଓ ଅଲିମ୍ପିକ୍ସ ଦେଶ ପାଇଁ ରୌପ୍ୟ ପଦକ ଆଣିଥିଲେ । ସେ ଅଲିମ୍ପିକ୍ସରେ ରୌପ୍ୟ ଜିତିବାରେ ଥିଲେ ଭାରତର ପ୍ରଥମ ମହିଳା ଭାରୋତ୍ତୋଳନକାରୀ । ଅର୍ଜ୍ଜୁନ ପୁରସ୍କାର ବିଜେତା ଶ୍ରୀ ସତୀଶ ଶିବଲିଙ୍ଗ, ସୁଶ୍ରୀ ରେଣୁ ବାଳା, ସୁଶ୍ରୀ ସଞ୍ଜିତା ଚାନୁ ପ୍ରମୁଖ ରେଳବାଇ ଠାରୁ ପ୍ରୋତ୍ସାହନ ପାଇ ଭାରୋତ୍ତୋଳନ କ୍ଷେତ୍ରରେ ଶୀର୍ଷସ୍ତରୀୟ ସଫଳତା ହାସଲ କରିପାରିଛନ୍ତି ।